तरुण पिढीसाठी कॉलेज आयुष्य आणि प्रेम हे गाडीच्या दोन चाकासारखे असते. असंच एक कॉलेजमधले तरुण प्रेम घेऊन येत आहे मराठी चित्रपट बॉईज २. बॉईज चित्रपटाला प्रेक्षकांनी भरभरून प्रेम दिल्यानंतर बॉईज २ कडून चाहत्यांच्या अपेक्षा उंचावल्या आहे. चाहत्यांची हीच अपेक्षा पूर्ण करण्यासाठी बॉईज २ मधील ‘शोना’ हे रोमँटिक गाणं लडाख अश्या बर्फाळ प्रदेशात शूट करण्यात आलं आहे.
बॉईज २ मधील ‘शोना’ हे रोमँटिक साँग नुकतेच सोशल नेट्वर्किंग साईटवर लाँच करण्यात आले. प्रेमविश्वात नुकतंच पदार्पण झालेल्या मुलाच्या प्रेमाच्या गुलाबी थंडीची जाणीव हे गाणं देऊन जाते. या गाण्याला प्रेक्षांकाकडून चांगला प्रतिसाद मिळत आहे.
शोना या गाण्याचे बोल सुप्रसिद्ध प्रेमगीतकार मंदार चोळकर यांनी दिले असून, रोहित राऊत आणि जुईली जोगळेकरचा गोड आवाज बॉईज २ च्या या रोमांटिक गाण्याला लाभला आहे. निसर्गाच्या कुशीत आणि बोचऱ्या थंडीत प्रेमाची हळूवार पालवी फुलवणारं हे गाणं सुमंत शिंदे आणि सायली पाटील या फ्रेश जोडीवर चित्रित करण्यात आले आहे. प्रेमीजोडप्यांना आकर्षित करणाऱ्या या गाण्यातील विहंगम दृश्य रसिकांचे मन मोहून टाकतात.
बॉईज २ च्या या गाण्याने प्रेक्षकांची मन जिंकली असली तरी या गाण्यासाठी कलाकारांनी प्रचंड मेहनत घेतली आहे. लेह लडाख सारख्या बर्फाळ प्रदेशात हवामानाच्या अंदाजानुसार एखादं गाण्याचे चित्रीकरण करणे हे बोलण्याइतके सोप्पे नसते. तिकडच्या अतिथंडीने नाकातून रक्त आल्यामुळे अनेकजणांना दवाखान्यात दाखल करावे लागले होते. इतकेच नव्हे तर, या गाण्याच्या आणि इतर काही भागांच्या चीत्रीकरणादरम्यान कलाकारांना ऑक्सिजन सिलेंडरद्वारे श्वास घ्यावा लागला होता. अश्या या वातावरणात चित्रित करण्यात आलेले हे गाणे, प्रेक्षकांच्या चांगल्याच पसंतीस पडत आहे.
इरॉस इंटरनेशनल आणि एवरेस्ट इंटरटेंटमेन्ट प्रस्तुत, अवधूत गुप्ते यांच्या सहयोगाने सुप्रीम मोशन पिक्चर्स प्रोडक्शनअंतर्गत येत्या ५ ऑक्टोबर रोजी प्रदर्शित होत असलेला हा सिनेमा, ‘बॉईज’चा डबल धमाका घेऊन येत आहे. इतकेच नव्हे तर इरॉस इंटरनेशनलद्वारे हा चित्रपट जागतिक स्तरावरदेखील वितरीत केला जाणार आहे.सुमंत शिंदेबरोबरच पार्थ भालेराव आणि प्रतिक लाडची प्रमुख भुमिकेत असलेल्या या सिनेमात तरुण कलाकारांचा मेळाच आपल्याला पाहायला मिळणार आहे.
तुम्ही हे गाणं येथे ऐकू शकता.
