भारतीय सिनेसृष्टीत सध्या सत्य घटनेवर आधारित सिनेमे, सीरिज जोर धरू लागले आहेत. यांमधून अनेकदा कधीही न उलगडलेल्या अनेक गोष्टी मनोरंजन सृष्टीमार्फत प्रेक्षकांसमोर येत असतात. त्यामुळे प्रेक्षकही फारच आवडीने या सीरिज आणि सिनेमांचा आनंद घेत असतात.
शेअर मार्केटमध्ये प्रचंड मोठा घोटाळा करणाऱ्या हर्षद मेहताची गाजलेली गोष्ट ‘स्कॅम १९९२’ या वेब सीरिजमधून हंसल मेहता यांनी दाखवली होती. त्यांनंतर २००३ साली झालेल्या स्टॅम्प पेपर घोटाळ्याने अख्खा देश हादरला होता. आता त्याच घोटाळ्यावर आधारित ‘स्कॅम २००३ – द तेलगी स्टोरी’ ही वेब सीरिज लवकरच प्रेक्षकांच्या भेटीला येणार आहे. या सीरिजचा ट्रेलर नुकताच प्रदर्शित झाला आहे.
ट्रेलर प्रदर्शित झाल्यापासून प्रेक्षकांची उत्सुकता देखील शिगेला पोहोचली आहे. ट्रेलरनुसार या घोटाळ्याचा मास्टरमाईंड ‘अब्दुल करीम तेलगी’ स्टॅम्प तयार करून ३० हजार कोटींचा घोटाळा करण्यात कसा यशस्वी होतो हे दाखवण्यात आले आहे. याशिवाय या ट्रेलरमधून आणखी एक रंजक गोष्ट समोर आली आहे. हिंदी भाषेतील या सीरिजमध्ये मराठी सिनेसृष्टीतील अनेक दिग्गज कलाकार झळकणार आहेत. त्यात अभिनेता शशांक केतकर, निखिल रत्नपारखी, भरत दाभोळकर, समीर धर्माधिकारी आणि प्रेक्षकांमधील लोकप्रिय अभिनेता भरत जाधव देखील या वेब सीरिजमध्ये अभिनय करताना दिसणार आहे.
तर आपले हे लाडके मराठमोळे कलाकार येत्या १ सप्टेंबरला या घोटाळ्याची कहाणी उलगडणार आहे. सोनी लिव्हवर ही सीरिज प्रेक्षकांना पाहता येणार आहे. शशांक केतकरने या सीरिजमधील एक फोटो शेअर करत “स्कॅम २००३ चा ट्रेलर पाहून मी आनंदी झालो.” असे लिहिले आहे. या सीरिजचे दिग्दर्शन तुषार हिरानंदानी यांनी केले असून सीरिजची निर्मिती हंसल मेहता यांनी केली आहे.
तर आता या सीरिजकडे प्रेक्षक डोळे लावून बसले आहेत. कारण त्यांना माहित नसलेल्या अनेक गोष्टी आणि त्यांचे काही प्रश्न या सीरिजमधून सुटणार असा विश्वास त्यांना आहे.