सौंदर्याची परिभाषा ही रंग, रुप किंवा देहरचनेवर आधारित नसते हे अभिनेत्री वनिता खरात (Vanita Kharat) हिने सिद्ध केलं आहे. ‘महाराष्ट्राची हास्यजत्रा’ या कार्यक्रमामधून वनिता प्रेक्षकांना खळखळून हसवते. या कार्यक्रमामुळेच ती नावारुपाला आली. वनिताच्या विनोदाचा अचूक टायमिंग तर कमालीचा आहे. ‘महाराष्ट्राची हास्यजत्रा’ सेट सहकलाकारांबरोबर वनिता धमाल-मस्ती करताना दिसते. आता याच सेटवरील तिचा मजेशीर व्हिडीओ सोशल मीडियावर व्हायरल होत आहे.
१९ जुलैला वनिताचा वाढदिवस होता. यानिमित्त तिच्या मित्र-मैत्रिणींनी तिला वाढदिवसाच्या शुभेच्छा दिल्या. ‘महाराष्ट्राची हास्यजत्रा’मधील तिचा सहकलाकार प्रसाद खांडेकर वनिताचा एक मजेशीर व्हिडीओ शेअर करत तिला वाढदिवसाच्या शुभेच्छा दिल्या. या व्हिडीओमध्ये वनिता कार्यक्रमाच्या चित्रीकरणादरम्यान झोपताना दिसत आहे. तिच्या या व्हिडीओला नेटकऱ्यांनी चांगला प्रतिसाद दिला आहे.
View this post on Instagram
प्रसादने वनिताचा हा मजेशीर व्हिडीओ शेअर करत म्हटलं की, “जादूचा व्हिडीओ. हा व्हिडीओ सुरु केला की तुम्ही ‘वने’ अशी जोरात हाक मारा. मग जादू होईल. वनी तुमच्याकडे बघेल मग तिला बर्थडे विश करा. आज आमच्या वनीचा म्हणजेच बबड्याचा वाढदिवस आहे. आमच्या सेट वरील सगळ्यांची लाडकी, सगळ्यांकडे हक्काने हट्ट करून स्वतःचे लाड पुरवून घेणारी वनी. वने तुला आयुष्यात जे जे हवं ते ते सगळं तुला मिळो.”
प्रसाद खांडेकरबरोबरच समिर चौघुलेने देखील वनिताबरोबरचा फोटो शेअर करत तिला वाढदिवसाच्या शुभेच्छा दिल्या. वनिताने ‘कबीर सिंग’ सारख्या हिंदी चित्रपटामध्ये काम करत अभिनेत्री म्हणून स्वतःला सिद्ध केलं. अजूनही ती नवीन भूमिका करण्यासाठी धडपड करत आहे.